ڈیرہ بگٹی آپریشن میں 2 فوجی ہیلی کاپٹر تباہ ہوگئے بی آر پی کے ترجمان کا دعویٰ

کوئٹہ(آن لائن)بلوچ ری پبلیکن پارٹی کے مرکزی ترجمان شیر محمد بگٹی نے کہا ہے کہ ریاست بلوچ نسل کشی کی پالیسیوں پر عمل پیرا ہے ڈیرہ بگٹی اور گردنواح میں فورسز نے آپریشن تیز کردیا ہے گھوڑی ،مارواڑ ا ل یسٰین و گردونواح میں فورسز نے آپریشن تیز کردیا ہے آپریشن کے دوران ہیلی کاپٹر گن شپ ہیلی کاپٹر جیٹ طیارے حصہ لے رہے ہیں اس آپریشن کے دوران فورسز کے دو ہیلی کاپٹر گر کر تباہ ہوئے ہیں جبکہ ہماری اطلاعات کے مطابق چالیس کمانڈوز بھی لاپتہ ہوئے ہیں انہوں نے کہا کہ ریاستی فورسز نے اپنی ناکامی و نااہلی کو چھپانے کیلئے معصوم بے گناہ اور نہتے افراد پر بمبارمنٹ شروع کردی ہے انہیں ظلم وجبر کا نشانہ بنایا جارہا ہے ترجمان نے کہا کہ ریاستی فورسز کی جانب سے حالیہ کارروائی نے تراتانی کی یاد تازہ کردی ہے جس میں کلسٹر بم کا استعمال کیا جارہا ہے لیکن اقوام متحدہ اور انسانی حقوق کے اداروں کی خاموشی قابل افسوس ہے انہوں نے نوشکی کے علاقے کلی جمالدینی میں پارٹی کارکنوں پر فائرنگ و سیاسی کارکنوں کی گرفتاریوں کو بلوچ دشمن پالیسیوں کا تسلسل قرار دیتے ہوئے کہا کہ ریاستی ظلم وجبر بلوچ قومی آزادی کا راستہ نہیں روک سکتے ہمارے جدوجہد عظیم مقصد کے حصول تک جاری رہی گی انہوں نے بلوچ قوم سے 11اگست کو پر جوش انداز میں منانے پر اظہار تشکر کرتے ہوئے اپیل کی کہ اس قومی جذبے سے 14اگست کو یوم سیاہ کے طور پر منا کر ریاستی ظلم وجبر اور بلوچ دشمن پالیسیوں کیخلاف اپنا احتجاج ریکارڈ کرائیں اور عالمی دنیا کو باور کرائیں کہ بلوچ کا اس ریاست کیساتھ کوئی تعلق نہیں بلکہ وہ آزاد اور خود مختار ریاست کے حصول کیلئے جدوجہد میں برسرپیکار ہیں ہماری جدوجہد خون کے آخری قطرے تک جاری رہے گی